Netbal

o.15 netbal is die mediumskole wenners 🥳

Op Saterdag 8 Augustus het twee van ons netbalspanne deurgedring na die finale in die Mediumskoleliga in Kimberley. Die o.14-span speel reeds in die eerste rondte teen Curro Kathu. Hulle neem gou die voortou en wen die wedstryd gemaklik 14 – 7. Daarna kompeteer hul in die semi-finale teen HS Hopetown. Met uitstekende spel, slaag hulle daarin om 17 – 5 te wen. In die finale wedstryd speel hulle teen HS Hartswater. Tot halftyd bly dit ‘n kop-aan-kop stryd. Senuwees begin sy tol eis en onnodige foute na halftyd laat die span agter raak. Hul kom met ‘n baie goeie terugveg poging, maar ongelukkig is daar nie genoeg tyd om die agterstand uit te wis nie. Die o.14-span eindig dus tweede in die Mediumskoleliga. Die o.15-span speel in hul eerste wedstryd teen HMO. Hul wen 15 – 1. Daarna is hul slaags met HS Douglas in ‘n verbete stryd. Hul moet na halftyd ‘n agterstand inhaal. Die goeie spel van die Doelverdediger maak dit egter moontlik om genoeg balle te draai en wen hulle die wedstryd 8 – 6. Ook húlle moet vir HS Hartswater in die finaal aanvat. Hul skitterende spanspel en veggees tot die einde verseker hul oorwinning en kan hul met trots as die wenners van die Mediumskoleliga uit die stryd tree. Baie geluk! HSDA is trots op jul jong Arende wat so hoog vlieg🦅

HSDA se netbalspanne skitter teen Adamantia

Hoërskool De Aar se netbalspanne het die afgelope naweek 'n uitstekende dag op die bane beleef tydens hul interskole-wedstryde teen Adamantia. Die Eerstespan, o.17A-, o.15A-, o.15B- en o.14A-spanne het almal met puik spel en uitstekende spanwerk hul wedstryde gewen. Die spelers het deurentyd vasberadenheid, spangees en deursettingsvermoë getoon, wat tot 'n skoon sweep van oorwinnings gelei. Die ondersteuners het die bane met entoesiasme gevul en die spelers aangemoedig, wat tot die besondere atmosfeer van die dag bygedra het. Baie geluk aan al die spelers en afrigters met hierdie uitstekende prestasie. Julle harde werk en toewyding het beslis vrugte afgewerp.

🏐 Netbal 🏐

Op 26 Mei het Hoërskool De Aar se netbalspanne teen Hoërskool Middelburg in opwindende wedstryde meegeding. Die o.14A-span het ’n uitstekende wedstryd gespeel en met 15–9 geseëvier. Die spelers het goeie spanwerk en deursettingsvermoë getoon om die oorwinning te verseker. Die o.15A-span was in uitstekende vorm en het hul wedstryd oortuigend met 17–3 gewen. Die span het deurgaans beheer van die wedstryd gehandhaaf en puik netbal gelewer. Die o.17A-span het ook ’n sterk vertoning gelewer en hul wedstryd met 13–9 gewen. Die spelers het hard gewerk en goeie samewerking op die baan getoon. Die eerstespan het ’n taai wedstryd gehad en het ongelukkig die wedstryd verloor. Ten spyte van die uitslag het die span met vasberadenheid gespeel en waardevolle ervaring opgedoen. Baie geluk aan al die spanne met hul harde werk en sportgees. Ons is trots op elke speler wat Hoërskool De Aar met trots verteenwoordig het!!

🏐 HSDA-netbal gaan groot! 🏐

Vier van HSDA se netbalspanne is vanjaar ingeskryf vir die NK-netballiga. Al vier het gekwalifiseer vir die Pixley ka Seme-finale wat op Donderdag 13 Mei gehou is. Gelukkig was dit ’n heerlike sonnige dag en is netbal uit die boonste rakke opgedis.
Ons o.14-span wen 3 van hul 4 wedstryde. Ongelukkig verloor hulle met slegs 1 doel teen HS Douglas, maar hul oorwinnings is só goed dat hulle steeds as nommer 1 in Pixley uit die stryd tree.
Die o.15-span speel heelwat van hul wedstryde gelykop en eindig tweede in Pixley.
Die o.16-span speel gelykop teen HS Hopetown, verloor teen Veritas, maar wen 19–4 teen HS Theron. Hulle eindig tweede in hul afdeling.
Ons o.17-span sukkel eers om aan die gang te kom en verloor met 1 doel teen HS Douglas, maar speel daarna kookwaternetbal en wen die res van hul wedstryde. Hulle eindig eerste in hul ouderdomsgroep.
Al vier ons spanne dring dus deur na die NK-uitspele wat vanaf 15 Junie in Upington gaan plaasvind. Baie geluk aan elke speler wat haar beste gegee het en verseker het dat HSDA so suksesvol was by die uitspele. Baie dankie aan al ons ondersteuners wat ons spelers help bemoedig.
Op Saterdag 16 Mei speel ons o.14- en o.17-spanne teen HS Blinkklip. Albei spanne wen oortuigend.

🏐 Hoërskool De Aar blink uit by Emthanjeni-liga 🏐

Hoërskool De Aar se netbalspanne het Dinsdag en Saterdag uitstekend gevaar tydens die Emthanjeni-liga - met al vier spanne wat deurdring na die Pixley Wennersdag wat volgende week in De Aar plaasvind.
Die o.14-span het besonder sterk vertoon en beide hul wedstryde teen Orion en Veritas gewen.
Die o.15-span het ook goeie netbal gespeel deur gelykop teen Orion te eindig en daarna ’n oorwinning teen Veritas te behaal.
Die o.16-span het hard probeer, maar het ongelukkig teen Veritas vasgeval.
Die o.17-span het ’n goeie oorwinning teen Orion behaal, maar moes later die knie teen Veritas buig.
Hoërskool De Aar is trots op al die spelers se harde werk, deursettingsvermoë en sportmangees. Ons wens al vier spanne alles van die beste toe vir die Pixley Wennersdag!

💎 Diamante Skitter 🏐

Elf van HSDA se netbalspeelsters neem deel aan die NK-diamante proewe in Kimberley. Op die 1ste en 2de Mei 2026, het 11 van HSDA se netbalspeelsters deelgeneem aan die Noord-Kaap Diamante-netbalproewe. Hierdie span wat gekies word speel later in die jaar in die “All Ages”- toernooi, wat in Boksburg gehou word, teen ander Provinsiale spanne. Die netbalspeelsters het hul staal gewys en 5 van HSDA se speelsters het die NK-Diamantespan gehaal. Ons sê baie geluk aan die volgende speelsters en wens vir hulle net die beste toe:
o.14: Grace Dikela en Leighrin Oliphant
o.15: Lubulele Hlomela
o.16: Shanté Erasmus
o.17: Likhanyise Moni

🏐 Netbal: HSDA vs Hopetown 🏐

Hoërskool De Aar se netbalspanne het op Dinsdag, 29 April teen Hoërskool Hopetown kragte gemeet.
Die o.14A-span het uitstekend gevaar en ’n oortuigende oorwinning van 18–4 behaal.
Die o.16-span het hard gespeel, maar moes ongelukkig die knie buig met 19–8.
Die eerste span het ook sterk kompetisie ervaar en die wedstryd met 36–13 verloor.
Baie geluk aan al die spelers met hul harde werk en sportgees!

🏐 Netbal: HSDA vs Colesberg 🏐

Die o.15B-netbalspan het verlede week Woensdag, 29 April, in Colesberg aan twee wedstryde deelgeneem. Alhoewel die span ongelukkig albei wedstryde verloor het, het die meisies hulself uitstekend van hul taak gekwyt. Hulle het deurgaans goeie netbal gespeel en besondere uithouvermoë op die baan getoon. Ten spyte van die teleurstelling van twee nederlae, het hulle nie moed opgegee nie en tot die einde toe hard bly veg. Die span het die ware karakter van ’n arend gewys — vasberadenheid, deursettingsvermoë en trots. Hulle het nie net karakter op die baan getoon nie, maar ook daarbuite en hul skool met waardigheid verteenwoordig.

🏐 HSDA NETBAL🏐

Vier-en-twintig van ons netbalspelers het deurgedring na die Pixley ka Seme-netbalproewe op Saterdag, 25 April. Ons spelers het goed vertoon teen al die ander skole - die bestes in die streek. Elf van hulle is gekies om gedurende die langnaweek (van 1 Mei) aan die Noord-Kaap Diamante-proewe in Kimberley deel te gaan neem. 🎉 Baie geluk aan die volgende spelers:
o.17: Likhanyise Moni en Taylor van Tonder o.16: Elbenique Makaleni, Ndimphu Wonga, Cashmé-Ann Hendricks en Shanté Erasmus
o.15: Lubulele Hlomela, Charlteney Loff en Liyabona Lolwana
o.14: Grace Dikela en Leighrin Oliphant
Sterkte vir die volgende rondte, ons is trots op julle! 🦅

🏐 Netbal 🏐

Ons beleef ‘n suksesvolle netbalnaweek in Jan Kempdorp. Al vyf HSDA-netbalspanne meet kragte met Hoërskool Vaalharts. Die eerstespan spring met mening weg en bou ‘n goeie voorsprong op in die eerste kwart. In die volgende twee kwarte is die spanne kop-aan-kop. In die vierde kwart verseker ons spelers ons oorwinning met baie goeie verdedigende spel en akkurate doele. Hul wen 24 – 14. Die o.17-span wen 16 – 3. Hulle het baie goed saamgespeel en die verdedigers het die lewe vir die opponente moeilik gemaak. Die o.15A-span wen ook gemaklik met 22 – 4. Die o.14’s wen 22 – 11. Albei hierdie spanne se netbal ontwikkel met elke wedstryd wat gespeel word en hul speel hul harte uit! Die o.15B-span verloor ongelukkig 8 – 11 teen Vaalharts se o.19B-span. Hulle het goeie veggees getoon en teen die einde die opponente begin inhaal...

🏐 NETBALPROEWE 🏐

Woensdag, 15 April het 32 van ons skool se netbalspelers aan die Emthanjeni-proewe deelgeneem. Baie geluk aan die volgende spelers wat deur is na die Pixley-proewe wat 25 April plaasvind.

🏐 Netbaltoer na Sun City 🏐

Ons o.16- en o.17-netbalspanne het onlangs die voorreg gehad om aan ’n ongelooflike toer na Sun City Resort deel te neem – ’n wêreldklasbestemming wat werklik alles bied! Die toer het nie net oor netbal gegaan nie, maar ook oor groei, spanbou en die skep van lewenslange herinneringe. Die spelers het waardevolle wedstryd- en oefengeleenthede gekry wat hulle voorberei het vir die seisoen wat voorlê. Ons was besonder bevoorreg om deur Dorette Badenhorst, voormalige Protea-afrigter, afgerig te word. Haar kundigheid, passie en insig het ’n groot impak op elke speler gemaak en hulle geïnspireer om hul beste te gee. Hierdie toer het nie net ons vaardighede opgeskerp nie, maar ook die bande binne ons span versterk. Nuwe vriendskappe is gevorm, selfvertroue is gebou en herinneringe is geskep wat nog lank gekoester sal word. Baie dankie aan almal wat hierdie geleentheid moontlik gemaak het. Dit was werklik ’n ervaring wat ons nooit sal vergeet nie!

🏐HSDA se netbalspanne toon veggees🏐

Hoërskool De Aar het onlangs teen Hoërskool Hartswater netbal gespeel in ’n dag vol opwinding en goeie sportmangees. Ons spelers het met groot ywer en trots op die baan verskyn en hul beste gelewer. HSDA se spelers het vasberadendheid,deursettingsvermoe en goeie spanwerk getoon,maar kon ten spyte hiervan nie die oorwinings behaal nie slegs die o.19B-span kon oortuigend as oorwinnaars van die baan stap. Hoërskool De Aar is trots op al hul netbalspelers se toewyding en veggees. Hierdie wedstryde het waardevolle ervaring gebring wat hulle sal help om nóg sterker terug te kom.

Netbal: Sportdag by Hoërskool Bloemfontein

Vier van ons netbalspanne het die afgelope naweek aan ’n sportdag by Hoërskool Bloemfontein deelgeneem. Die spanne het reeds 03:30 Saterdagoggend vertrek en eers laat die aand weer tuisgekom na ’n lang en warm dag vol netbal. Ons het teen sterk teenstanders gespeel met die volgende uitslae:
o.14 A-span

Verloor 5-9 teen Hoërskool Bloemfontein

Verloor 5-9 teen Hoërskool Bloemfontein

Wen 35-0 teen Ladybrand

Verloor 10-3 teen Sand Du Plessis

o.15 A-span

Wen 20-8 teen Ladybrand

Verloor 19-7 teen Hoërskool Bloemfontein.

Wen 12-7 teen Sand du Plessis

o.16 A-span

Wen 17-4 teen Sand du Plessis

o.17 A-span

Wen 14-9 teen Hoërskool Bloemfontein

Verloor 11-15 teen Ladybrand

Speel gelyk op teen Hoërskool Bloemfontein se tweedespan

Eerstespan

Verloor 7-9 teen HTS

Verloor 12-19 teen Hoërskool Bloemfontein

Ons spelers het deur die dag deursettingsvermoë, goeie spanwerk en uitstekende sportmanskap getoon.

Ons is baie trots op elke speler wat hul skool met trots verteenwoordig het.

Baie geluk aan die span met hul harde werk en goeie wedstryde.

HSDA netbal teen HS Sentraal

Vier van HSDA se netbalspanne het die 2026-seisoen met wedstryde teen Hoërskool Sentraal in Beaufort-Wes afgeskop. Waardevolle ervaring is opgedoen vir samespel, aangesien die spanne nog min geleentheid gehad het om saam te oefen. Die spelers was baie entoesiasties en het met goeie gees voluit gespeel. Ongelukkig kon slegs die o.17-span daarin slaag om te wen. Die o.15-span het met slegs een doel verloor. HSDA sien uit na Saterdag se wedstryde by die Kÿto Karoofees.

Netbalkliniek saam Mické Engelbrecht

Op 13 en 14 Februarie, het HSDA se onder 14- en 15-netbalspanne ‘n netbalkliniek bygewoon wat Mické Engelbrecht in De Aar aangebied het. Mické is ‘n kranige netbalafrigter en ‘n raakvatter op hierdie gebied. Sy was ‘n NK-𝘋𝘪𝘢𝘮𝘰𝘯𝘥𝘴 speelster en het ook al NK-netbalspanne op skoolvlak afgerig. Sy het haar kennis en ervaring met ons skool se leerders kom deel. Die speelsters het elke oomblik geniet en het ook baie geleer. Ons sien uit na die res van die seisoen om te sien hoe die spanne hierdie afrigting gaan benut! See less